ଦିଲ୍ଲୀ ନିର୍ବାଚନରେ ପରାଜୟ ପରେ ଆସିଲା କେଜ୍ରିଓ୍ବାଲଙ୍କ ପ୍ରତିକ୍ରିୟା

୪୮ ଆସନରେ ବିଜୟୀ ହେବା ସହ ଦୀର୍ଘ ୨୭ ବର୍ଷ ପରେ ଦିଲ୍ଲୀରେ ସରକାର ଗଢ଼ିବାକୁ ଯାଉଛି ଭାରତୀୟ ଜନତା ପାର୍ଟି (ବିଜେପି) । ସେପଟେ ଆମ୍‌ ଆଦମୀ ପାର୍ଟି (ଆପ୍‌)ର ଦୀର୍ଘ ବର୍ଷର ଶାସନ ଦୂର୍ଗ ଭୁଶୁଡ଼ି ପଡ଼ିଛି । କେବଳ ୨୨ ଆସନ୍‌ରେ ବିଜୟୀ ହୋଇଛି ଆପ୍‌ । ସେପଟେ ପୂର୍ବତନ ମୁଖ୍ୟମନ୍ତ୍ରୀ ଏବଂ ଆପ୍‌ ସୁପ୍ରିମୋ ଅରବିନ୍ଦ କେଜ୍ରିଓ୍ବାଲ ମଧ୍ୟ ପରାଜୟ ବରଣ କରିଛନ୍ତି ।

ପରାଜୟ ପରେ କେଜ୍ରିଓ୍ବାଲଙ୍କ ପ୍ରତିକ୍ରିୟା ମିଳିଛି । ଆପ୍‌ର ରାଷ୍ଟ୍ରୀୟ ସଂଯୋଜକ କେଜ୍ରିଓ୍ବାଲ କହିଛନ୍ତି, ଜନତାଙ୍କ ନିଷ୍ପତ୍ତିକୁ ଆମେ ଗ୍ରହଣ କରୁଛୁ । ମୁଁ ବିଜେପିକୁ ଏହି ବିଜୟ ପାଇଁ ଅଭିନନ୍ଦନ ଜଣାଉଛି । ଜନସାଧାରଣ ତାଙ୍କୁ ଯେଉଁ ଆଶା ସହିତ ବହୁମତ ଦେଇଛନ୍ତି, ସେ ତାହା ପୂରଣ କରିବେ ।

ଅରବିନ୍ଦ କେଜ୍ରିୱାଲ କହିଛନ୍ତି, “ଗତ ୧୦ ବର୍ଷ ଲୋକମାନେ ଆମକୁ ସୁଯୋଗ ଦେଇଛନ୍ତି। ଆମେ ବହୁତ କାମ କରିଛୁ । ଶିକ୍ଷା, ସ୍ୱାସ୍ଥ୍ୟ, ପାଣି, ବିଦ୍ୟୁତ୍ ଏବଂ ଅନ୍ୟାନ୍ୟ କ୍ଷେତ୍ରରେ ଆମେ ଲୋକଙ୍କୁ ଆଶ୍ୱସ୍ତି ଦେବାକୁ ଚେଷ୍ଟା କରିଛୁ ।

ଆମେ ଦିଲ୍ଲୀର ଭିତ୍ତିଭୂମିକୁ ଉନ୍ନତ କରିବାକୁ ଚେଷ୍ଟା କରିଛୁ । ଏବେ, ଲୋକମାନଙ୍କ ନିଷ୍ପତ୍ତି କ୍ରମେ ଆମେ କେବଳ ଏକ ଗଠନମୂଳକ ବିରୋଧୀ ଭୂମିକା ଗ୍ରହଣ କରିବୁ ନାହିଁ ବରଂ ସମାଜସେବା ମଧ୍ୟ କରିବୁ, ଲୋକଙ୍କ ସୁଖ ଏବଂ ଦୁଃଖରେ ସାହାଯ୍ୟ କରିବୁ । ବ୍ୟକ୍ତିଗତ ଭାବରେ, ଯାହାକୁ ଆମର ଆବଶ୍ୟକତା ଅଛି, ଆମେ ସର୍ବଦା ସେମାନଙ୍କ ସୁଖ ଏବଂ ଦୁଃଖରେ ସାହାଯ୍ୟ କରିବୁ। କାରଣ ଆମେ କ୍ଷମତା ପାଇଁ ରାଜନୀତିକୁ ଆସି ନାହୁଁ ।”

ସେ ଆହୁରି କହିଛନ୍ତି, “ଆମେ ରାଜନୀତିକୁ ଏକ ମାଧ୍ୟମ ଭାବରେ ବିବେଚନା କରୁ ଯାହା ମାଧ୍ୟମରେ ଆମେ ଜନସାଧାରଣଙ୍କ ସେବା କରିପାରିବା। ଯାହା ମାଧ୍ୟମରେ ଆମେ ଲୋକଙ୍କ ସୁଖ ଏବଂ ଦୁଃଖରେ ସାମିଲ ହୋଇପାରିବା । ଆମେ କାମ କରି ଚାଲିବୁ ଏବଂ ଭବିଷ୍ୟତରେ ମଧ୍ୟ ଆମକୁ ସେହିପରି ଲୋକଙ୍କ ସୁଖ ଏବଂ ଦୁଃଖରେ ସାହାଯ୍ୟ କରିବାକୁ ପଡିବ।

ମୁଁ ଆମ ଆଦମୀ ପାର୍ଟିର ସମସ୍ତ କର୍ମୀଙ୍କୁ ଅଭିନନ୍ଦନ ଜଣାଇବାକୁ ଚାହୁଁଛି। ଆପଣ ବହୁତ ଭଲ କାମ କରିଛନ୍ତି। ଆପଣ ବହୁତ କଠିନ ପରିଶ୍ରମ କରିଛନ୍ତି। ଆପଣ ଏକ ମହାନ ନିର୍ବାଚନ ଲଢ଼ିଛନ୍ତି ଏବଂ ମୁଁ ସମସ୍ତ କର୍ମୀଙ୍କୁ ଅଭିନନ୍ଦନ ଜଣାଇବାକୁ ଚାହୁଁଛି।”

ସୂଚନାଯୋଗ୍ୟ ଯେ, କେବଳ ଆମ ଆଦମୀ ପାର୍ଟି ପରାସ୍ତ ହୋଇନାହିଁ, ଅରବିନ୍ଦ କେଜ୍ରିଓ୍ବାଲ ନିଜେ ମଧ୍ୟ ନିଜ ଆସନ ବଞ୍ଚାଇ ପାରିନାହାଁନ୍ତି। ତାଙ୍କୁ ନୂଆଦିଲ୍ଲୀ ବିଧାନସଭା ଆସନରୁ ବିଜେପିର ପରବେଶ ବର୍ମା ପରାସ୍ତ କରିଛନ୍ତି । ଅରବିନ୍ଦ କେଜ୍ରିୱାଲ ୨୫୯୯୯ ଭୋଟ ପାଇଥିବା ବେଳେ ବିଜେତା ପରବେଶ ବର୍ମା ୩୦୦୮୮ ଭୋଟ ପାଇଛନ୍ତି। କଂଗ୍ରେସର ସନ୍ଦୀପ ଦୀକ୍ଷିତ ୪୫୬୮ ଭୋଟ ପାଇଛନ୍ତି ।