
ବିରାଟଙ୍କ ଶତକ ସହ ଭାରତର ୬ ଓ୍ଵିକେଟ୍ରେ ଦମଦାର ବିଜୟ
- ଖେଳ ଖବର
- February 24, 2025
- No Comment
- 9
ବିରାଟ କୋହଲିଙ୍କ ଦମଦାର ଶତକ ସହ ୬ ଓ୍ଵିକେଟ୍ରେ ଭାରତର ସୁନ୍ଦର ବିଜୟ । ପ୍ରଥମେ ବୋଲିଂ ର କମାଲ ଦେଖାଇବା ଓ ପରେ ପୁଣି ବ୍ୟାଟିଂରେ କମାଲ ଦେଖାଇଲା ଭାରତର । ୨୦୧୭ ଚାମ୍ପିଅନ୍ସ ଟ୍ରଫି ଫାଇନାଲ୍ ପରାଜୟର ପ୍ରତିଶୋଧ ନେଲା ରୋହିତ ବାହିନୀ । କୋହଲିଙ୍କ ଅପରାଜିତ ଶତକ ବଳରେ ପାକିସ୍ତାନକୁ ୬ ଓ୍ଵିକେଟ୍ରେ ହରାଇ ଦ୍ଵିତୀୟ ବିଜୟ ହାସଲ କରିବା ସହ ଚାମ୍ପିଅନ୍ସ ଟ୍ରଫି ୨୦୨୫ର ସେମି ଫାଇନାଲ୍ରେ ଆପାତଃତ ପ୍ରବେଶ କରିଛି ଭାରତ ।
ସଉଦ ସକିଲଙ୍କ ୬୨ ରନ, ମହମ୍ମଦ ରିଜଓ୍ଵାନଙ୍କ ୪୬ ରନ ଓ ଖୁଶଦିଲ ଶାହଙ୍କ ୩୮ ରନ ବଳରେ ପାକିସ୍ତାନ ୨୪୧ ରନ କରି ଭାରତକୁ ୨୪୨ ରନ ବିଜୟ ଲକ୍ଷ୍ୟ ଦେଇଥିଲା । ଜବାବରେ ଭାରତ ୪୨.୩ ଓଭରରେ ୪ ଓ୍ଵିକେଟ୍ ହରାଇ ୨୪୪ ରନରେ ସହଜ ବିଜୟ ହାସଲ କରି ନେଇଛି। ବିରାଟ କୋହଲି ଅପରାଜିତ ୧୦୦ ରନର ଇନିଂସ ଖେଳିଥିବା ବେଳେ ଶ୍ରେୟସ ଆୟର ୫୬ ରନ ଓ ଗିଲ୍ ୪୬ ରନ ଖେଳିଥିଲେ। ଅନ୍ୟପଟେ ପରାଜୟ ସହ ପାକିସ୍ତାନ ଟୁର୍ଣ୍ଣାମେଣ୍ଟର ବିଦା ହେବାର ଦ୍ଵାର ଦେଶରେ ପହଞ୍ଚି ଯାଇଛି।
୨୪୨ ରନର ବିଜୟ ଲକ୍ଷ୍ୟ ପିଛା କରିଥିବା ଭାରତୀୟ ଦଳକୁ ଦୁଇ ଓପନର ରୋହିତ ଶର୍ମା ଓ ଶୁଭମନ ଗିଲ୍ ୩୧ ରନ ଯୋଡ଼ିଥିଲେ। ରୋହିତ ଶର୍ମା ଆରମ୍ଭରୁ ଦ୍ରୁତ ବ୍ୟାଟିଂ କରି ୨୦ ରନରେ ଆଉଟ୍ ହୋଇଥିଲେ। ଏହା ପରେ ଗିଲ୍ ଓ ବିରାଟ କୋହଲି ଦଳର ଇନିଂସକୁ ଆଗକୁ ବଢାଇଥିଲେ। ଦୁଇ ବ୍ୟାଟର ଦ୍ଵିତୀୟ ଓ୍ଵିକେଟ୍ରେ ୬୯ ରନ ଯୋଡ଼ି ଟିମକୁ ବିଜୟ ଦ୍ୱାର ଦେଶକୁ ନେଇଥିଲେ।
ଦମଦାର ଫର୍ମରେ ଥିବା ଶୁଭମନ ଗିଲ୍ ୫୨ ବଲ୍ରୁ ୭ ଚୌକା ସହ ୪୬ ରନର ଉପଯୋଗୀ ଇନିଂସ ଖେଳିଥିଲେ। ଭାରତ ବିଜୟ ସୁନିଶ୍ଚିତ ହୋଇଥିବା ବେଳେ ଶେଷ ଆଡ଼କୁ ବିରାଟ କୋହଲିଙ୍କ ଶତକ ମୁଖ୍ୟ ଆର୍କଷଣ ପାଲଟିଥିଲା । କୋହଲିଙ୍କ ଶତକକୁ ନେଇ ପଡ଼ିଆରେ ଛକାପଞ୍ଝା ଜାରି ରହିଥିଲା। ଚୌକା ମାରି ଅର୍ଦ୍ଧଶତକ ହାସଲ କରିଥିବା କୋହଲି ଶେଷରେ ଚୌକା ମାରି ଦିନିକିଆ କ୍ରିକେଟ୍ରେ ୫୧ତମ ଶତକ ହାସଲ କରିଛନ୍ତି।
ଟସ ଜିତି ପାକିସ୍ତାନ ପ୍ରଥମେ ବ୍ୟାଟିଂ କରିଥିଲା। ଆରମ୍ଭରୁ ଦୁଇ ଓପନରଙ୍କୁ ହରାଇବା ପରେ ଅଧିନାୟକ ମହମ୍ମଦ ରିଜୱାନ ଓ ସାଉଦ ସାକିଲ ପାଳି ସମ୍ଭାଳିଥିଲେ। ଭଲ ପାର୍ଟନରସିପ କରିଥିଲେ କିନ୍ତୁ ଭାରତୀୟ ବୋଲର ସେମାନଙ୍କୁ ଅଧିକ ସମୟ ରହିବାକୁ ଦେଇ ନଥିଲେ। ସକିଲ ୬୨ ରନ କରିଥିବା ବେଳେ ରିଜୱାନ ୪୬ ରନ କରି ଆଉଟ ହୋଇଥିଲେ । ବାବର ଆଜମ୍ ୨୩ ଓ ଖୁସଦିଲ ଶାହ ୩୮ ରନ୍ କରିଛନ୍ତି । କୁଲଦୀପ ଯାଦବ ସର୍ବାଧିକ ୩ଟି ୱିକେଟ ନେଇଥିବା ବେଳେ ଭାରତ ପକ୍ଷରୁ ହାର୍ଦ୍ଦିକ ପାଣ୍ଡ୍ୟା ୨ ଏବଂ ଅକ୍ଷର ପଟେଲ, ହର୍ଷିତ ରାଣା ଓ ରବୀନ୍ଦ୍ର ଜାଡେଜା ଗୋଟିଏ ଲେଖାଏଁ ୱିକେଟ୍ ନେଇଛନ୍ତି ।