ଦ୍ବିତୀୟ ଟେଷ୍ଟ : ଭାରତ ଆଗରେ ୩୫୯ ରନର ଟାର୍ଗେଟ୍ ରଖିଲା ନ୍ୟୁଜିଲାଣ୍ଡ

ଦ୍ବିତୀୟ ପାଳିରେ ନ୍ୟୁଜିଲାଣ୍ଡ ଦଳ ୨୫୫ ରନ କରି ଅଲଆଉଟ୍ ହୋଇଛି । ପ୍ରଥମ ମ୍ୟାଚ୍ ହାରିବା ପରେ ଏବେ ଦ୍ବିତୀୟ ପରାଜୟରୁ ବର୍ତ୍ତିବା ଘରୋଇ ଭାରତୀୟ ଦଳ ପାଇଁ ଖୁବ୍ କଷ୍ଟସାଧ୍ୟ ହେବ । କାରଣ ମ୍ୟାଚର ଆହୁରି ଦୁଇ ଦିନ ବାକି ଅଛି ।

ଦ୍ବିତୀୟ ଇନିଂସରେ ନ୍ୟୁଜିଲାଣ୍ଡ ପକ୍ଷରୁ ଓପ୍ନର ଟମ୍ ଲଥାମଙ୍କ ୮୬ ରନ୍ ବ୍ୟତୀତ ୱିକେଟ୍ କିପର ଟମ୍ ବ୍ଲଣ୍ଡେଲ ୪୧ ଏବଂ ଗ୍ଲେନ୍ ଫିଲିପ୍ସ ଅପରାଜିତ ୪୮ ରନ୍ କରିଛନ୍ତି । ଭାରତ ପକ୍ଷରୁ ପୁଣିଥରେ ସୁନ୍ଦର ବୋଲିଂ କରି ୱାଶିଂଟନ୍ ସୁନ୍ଦର ସର୍ବାଧିକ ୪ଟି ଏବଂ ସ୍ପିନର ରବୀନ୍ଦ୍ର ଜାଡେଜା ୩ ଓ ରବିଚନ୍ଦ୍ର ଅଶ୍ବିନ୍ ୨ଟି ୱିକେଟ୍ ନେଇଛନ୍ତି ।

ନିଜର ପଞ୍ଚମ ଟେଷ୍ଟ ଖେଳୁଥିବା ୱାଶିଂଟନ୍ ଏହି ମ୍ୟାଚରେ ମୋଟ୍ ୧୧୫ ରନ୍ ଦେଇ ୧୧ଟି ୱିକେଟ୍ ଦଖଲ କରିଛନ୍ତି । ପ୍ରଥମ ଇନିଂସରେ ସେ ୫୯ ରନ୍ ଦେଇ ୭ଟି ୱିକେଟ୍ ନେଇଥିଲେ । ଏହା ତାଙ୍କର ସର୍ବଶ୍ରେଷ୍ଠ ବୋଲିଂ ପ୍ରଦର୍ଶନ ।

ପୂର୍ବରୁ ପ୍ରଥମ ପାଳିରେ ନ୍ୟୁଜିଲାଣ୍ଡ ୨୫୯ ରନ୍ କରିଥିବା ବେଳେ ଭାରତ ମାତ୍ର ୧୫୬ ରନ୍ କରିବାକୁ ସମର୍ଥ ହୋଇଥିଲା । ଏବେ ରୋହିତ ବାହିନୀକୁ ସମ୍ମାନ ରକ୍ଷା କରିବା ପାଇଁ ଅତି ସତର୍କତାର ସହ ଖେଳିବାକୁ ହେବ । ନଚେତ ପୁଣି ଏକ ପରାଜୟ ଅପେକ୍ଷା କରି ରହିଛି ।