USAIDରେ ଟ୍ରମ୍ପ ଛାଟ, ୨ ହଜାର କର୍ମଚାରୀଙ୍କୁ ଛଟେଇ, ହଜାରରୁ ଅଧିକଙ୍କୁ ଜବରଦସ୍ତ ଛୁଟି

ଆମେରିକା ରାଷ୍ଟ୍ରପତିଙ୍କ ଡୋନାଲ୍ଡ ଟ୍ରମ୍ପ ସରକାରର ବଡ଼ ନିଷ୍ପତ୍ତି । ୟୁଏସ୍ ଏଜେନ୍ସି ଫର ଇଣ୍ଟନେସନାଲ ଡେଭଲପମେଣ୍ଟ (USAID) ର ୨ ହଜାର କର୍ମଚାରୀଙ୍କୁ ଛଟେଇ କରିଛନ୍ତି । ଏଥିସହ ନୋଟିସ ଜାରି କରି ହଜାର ହଜାର ଲୋକଙ୍କୁ ଛୁଟିରେ ପଠାଯାଇଛି ।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଥମେ ହଜାର ହଜାର USAID କର୍ମଚାରୀଙ୍କୁ ବହିଷ୍କାର କରିବାକୁ ଚେଷ୍ଟା କରିବା ପରେ ଏହି ପଦକ୍ଷେପ ନିଆଯାଇଛି । ତା’ପରେ ତାଙ୍କୁ ଆଇନଗତ ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡିଲା । ଏକ ଫେଡେରାଲ୍ କୋର୍ଟ ଟ୍ରମ୍ପ ପ୍ରଶାସନକୁ USAID ଭାଙ୍ଗିବା ପାଇଁ ବାରଣ କରିଥିଲେ, ଏହି ସ୍ଥଗିତାଦେଶ ସ୍ଥାୟୀ ହେବ ନାହିଁ ବୋଲି ଶୁକ୍ରବାର ଦିନ ରାୟ ଦେଇଥିଲେ ।

ସରକାରଙ୍କ ଏହି ଯୋଜନା ଉପରେ ଅସ୍ଥାୟୀ ଭାବେ ରୋକ୍ ଲଗାଇବାକୁ USAID କର୍ମଚାରୀ କୋର୍ଟରେ ଆବେଦନ କରିଥିଲେ । କିନ୍ତୁ ଏହି ଆବେଦନକୁ ୟୁଏସ୍ ଡିଷ୍ଟ୍ରିକ୍ଟ ବିଚାରପତି କାର୍ଲ ନିକୋଲାସ୍ ଖାରଜ କରିଛନ୍ତି । କର୍ମଚାରୀଙ୍କୁ ଦିଆଯାଇଥିବା ବିଜ୍ଞପ୍ତିରେ କୁହାଯାଇଛି ଯେ, ଫେବୃଆରୀ ୨୩ ରାତି ୧୧ଟା ୫୯ରୁ USAIDର ସମସ୍ତ କର୍ମଚାରୀଙ୍କୁ ପ୍ରଶାସନିକ ଛୁଟିରେ ରଖାଯିବ ।

ବିଜ୍ଞପ୍ତିରେ କୁହାଯାଇଛି, USAID କର୍ମଚାରୀ ଯେଉଁମାନେ ଗୁରୁତ୍ବପୂର୍ଣ୍ଣ କାମ ପାଇଁ ରହିଛନ୍ତି, ସେମାନେ ଏଥିରେ ପ୍ରଭାବିତ ହେବେ ନାହିଁ । କିନ୍ତୁ ଏପର୍ଯ୍ୟନ୍ତ ଜଣାପଡିନି କି, କେତେ ଜଣ କର୍ମଚାରୀଙ୍କୁ ମହତ୍ତ୍ବପୂର୍ଣ୍ଣ ବୋଲି କୁହାଯାଇଛି ।

ସୂଚନାଯୋଗ୍ୟ, ନିକଟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାଶ୍ ପଟେଲଙ୍କ ନିଯୁକ୍ତିକୁ ପ୍ରଶଂସା କରିଥିଲେ । ଏଫବିଆଇ ଏଜେଣ୍ଟ ମଧ୍ୟରେ କାଶଙ୍କ ଲୋକପ୍ରିୟତା ଯୋଗୁଁ ତାଙ୍କୁ ନିର୍ଦ୍ଦେଶକ ଭାବେ ଚୟନ କରାଯାଇଛି । ସେ ସବୁଠାରୁ ଭଲ ଏଫବିଆଇ ନିର୍ଦ୍ଦେଶକ ହେବେ । ଟ୍ରମ୍ପ ପ୍ରଶାସନରେ ସେ ପ୍ରତିରକ୍ଷା ବିଭାଗର ଚିଫ୍ ଅଫ୍ ଷ୍ଟାଫ୍ ଏବଂ ନ୍ୟାସନାଲ୍ ଇଣ୍ଟେଲିଜେନ୍ସର ଡେପୁଟି ଡାଇରେକ୍ଟର ଭଳି ଗୁରୁତ୍ୱପୂର୍ଣ୍ଣ ପଦବୀରେ ରହିଥିଲେ ।