ଖେଳାଳିଙ୍କୁ କେମିତି ମିଳେ ସରକାରୀ ଚାକିରି

ଭାରତୀୟ କ୍ରିକେଟ ଦଳର ଫାଷ୍ଟ ବୋଲର ମହମ୍ମଦ ସିରାଜଙ୍କୁ ତେଲେଙ୍ଗାନା ସରକାର ଏକ ବଡ ଦାୟିତ୍ୱ ଦେଇଛନ୍ତି । ସେ ତେଲେଙ୍ଗାନା ପୋଲିସ ବିଭାଗରେ ଡିଏସପି ଭାବେ ନିଯୁକ୍ତି ପାଇଛନ୍ତି । ଟି-୨୦ ବିଶ୍ୱକପରେ ସିରାଜଙ୍କ ଭଲ ପ୍ରଦର୍ଶନ ପରେ ତେଲେଙ୍ଗାନା ସରକାର ସିରାଜଙ୍କୁ ସରକାରୀ ଚାକିରି ଏବଂ ଜମି ଦେବା ପାଇଁ ପ୍ରତିଶ୍ରୁତି ଦେଇଥିଲେ । ଗତ କିଛି ଦିନ ତଳେ ସିରାଜ୍ ଡିଏସପି ଭାବେ ନିଯୁକ୍ତି ପାଇଛନ୍ତି ।

ପୂର୍ବତନ ଖେଳାଳି ହରଭଜନ୍ ସିଂଙ୍କୁ ବି ପଞ୍ଜାବ ପୋଲିସରେ ଡେପୁଟି ଏସପି ଭାବେ ନିଯୁକ୍ତି ମିଳିସାରିଛି । ବର୍ତ୍ତମାନ ହରଭଜନ ଆମ ଆଦମୀ ପାର୍ଟିର ରାଜ୍ୟସଭା ସାଂସଦ ଅଛନ୍ତି ।

କ୍ରିକେଟ ଜଗତରେ ଅନେକ ଇତିହାସ ରଚିବା ପରେ ଧୋନୀଙ୍କୁ ପ୍ରାଦେଶୀକ ସେନା ଦ୍ୱାରା ଲେପ୍ଟନାଣ୍ଟ୍ କର୍ଣ୍ଣଲ ଭାବେ ସମ୍ମାନୀତ କରାଯାଇଥିଲା । ଧୋନୀଙ୍କୁ ଏହି ର୍ୟାଙ୍କରେ ନିଯୁକ୍ତି ମିଳିବା ପରେ ସେ ସମୟ ସମୟରେ ଆର୍ମୀ ଟ୍ରେନିଂ ନେଉଥିବାର ଦେଖିବାକୁ ମିଳିଛି ।

କ୍ରିକେଟ୍ ର ଭଗବାନ କୁହାଯାଉଥିବା ସଚିନ୍ ତେନ୍ଦୁଲକରଙ୍କୁ ବି ଭାରତୀୟ ବାୟୁସେନାରେ ବଡ ପଦବି ମିଳିସାରିଛି । ୨୦୧୦ ମସିହାରେ ସଚିନଙ୍କୁ ବାୟୁସେନା ଗ୍ରୁଫ୍ କ୍ୟାପ୍ଟେନ୍ ଭାବେ ସମ୍ମାନୀତ କରିଥିଲା ।

ସରକାରୀ ଚାକିରିରେ ନିଯୁକ୍ତି ପାଇଁ ଏକ ସ୍ପୋର୍ଟସ୍ କୋଟା ରହିଛି । ଯାହା ଅଧିନରେ ବିଶ୍ୱବିଦ୍ୟାଳୟ ସ୍ତରରୁ ନେଇ ରାଜ୍ୟ, ଜାତୀୟ ତଥା ଅନ୍ତର୍ଜାତୀୟ ସ୍ତର ପର୍ଯ୍ୟନ୍ତ ଖେଳାଳିଙ୍କୁ ସରକାରୀ ଚାକିରିରେ ନିଯୁକ୍ତି ଦିଆଯାଇଥାଏ । ଏହା ବ୍ୟତୀତ ରାଜ୍ୟ ତଥା କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ କୌଣସିବି ଦକ୍ଷ ଖେଳାଳିଙ୍କୁ ସିଧାସଳଖ ଭାବେ ନିଯୁକ୍ତି ପତ୍ର ପ୍ରଦାନ କରାଯାଇପାରିବାର ସୁବିଧା ରହିଛି ।

ଅର୍ଥାତ୍ ଖେଳାଳିଙ୍କୁ ସରକାରୀ ଚାକିରି ପାଇଁ କୌଣସି ଆବେଦନ କରିବାକୁ ପଡିନଥାଏ କିମ୍ବା ପଦବୀ ଖାଲି ହେବା ଯାଏଁ ଅପେକ୍ଷା କରିବାକୁ ପଡିନଥାଏ ।